旺菜素卷

病左個幾星期有多了，始終都未好曬，仲有少少咳同痰，一於今晚食清淡d，包個旺菜素卷

材料：

雞脾菇 

木耳

甘筍

旺菜 8片

薑蓉 半茶匙

醬汁：

蠔油 1.5湯匙

粟粉 1茶匙

水     3湯匙

獻汁：

蠔油  半湯匙

生抽   1湯匙

糖      半湯匙

粟粉  1茶匙

水      4湯匙

麻油   1茶匙

做法：

1. 木耳浸發後汆水切絲，甘荀去皮切幼條，雞脾菇洗淨切幼條

2. 旺菜洗淨，加少許鹽汆水2分鐘，過冷河備用

3. 白鑊先炒雞脾菇條至軟身盛起，原鑊下少許油爆香薑蓉，甘筍條及木耳絲炒約30秒，然後放入雞脾菇條，再將醬汁拌勻除後兜勻，盛起

4. 將餡料放在旺菜近葉部捲成筒形，收口向下，隔水蒸3分鐘，最後把獻汁拌勻煮滾淋上旺菜卷，完成

旋轉木馬蛋糕

自小就喜歡旋轉木馬，小時候很想擁有，現在人大了，就做個旋轉木馬蛋糕送給自己，雖然好攰，但見到製成品好開心，好滿足呀

蘿蔔炆魚鬆

古人常說不時不吃，這句話很有道理喔，呢段時間既白蘿蔔係最甜架，落左少少調味已經很鮮甜

材料：

已調味鯪魚肉   4両

白蘿蔔              1條

唐芹

水                     1碗

薑                     2片

雞粉                 半茶匙

鹽                     半茶匙

糖                     半茶匙

生抽                  少許

做法：

1. 白蘿蔔洗淨，去皮切件

2. 將已調味的鯪魚肉煎熟切條

3. 少油落薑爆香再落白蘿蔔兜匀，然後加入水，雞粉、鹽、糖、生抽兜匀

4. 炆大概45分鐘白蘿蔔淋身及收水，再落鯪魚肉及放上唐芹，完成

蕃茄飯

終於有時間整之前大熱蕃茄飯，加入炒香左既煙肉，就可以取替橄欖油，材料自由配搭，簡單又好味

材料：

煙肉

粟米粒

蕃茄1個

米

黑胡椒

鹽

做法：

1. 將米洗淨後加入清水，比平時少1/3，因為蕃茄會出水份

2. 蕃茄洗淨界十字，煎香煙肉碎，備用

3. 加入一茶匙鹽、半茶匙黑胡椒粒

4. 將整個蕃茄、粟米粒、煙肉碎放在飯煲內

5. 飯煲好後，用飯勺將蕃茄擠壓成泥，攪拌勻，完成

泰式辣椒膏炒蜆

上個月去泰國旅行買左好多醬汁返黎，今日係街市買左d蜆，求其亂整誤打誤撞既泰式炒蜆，加埋粉絲索哂d汁，好味又惹味

泰式辣椒膏炒蜆
材料：
蜆 1斤
乾蔥 1個
蒜 幾瓣
指天椒 2隻
辣椒膏 1.5湯匙
魚露 少許
鹽 少許
粉絲 1包
九層塔 適量

材料：
1. 蜆浸水，吐沙，洗淨備用
2. 浸軟一包細粉絲，乾蔥、蒜，切片
3. 先爆香乾蔥片、蒜及指天椒，落辣椒膏爆香，加入少許魚露，鹽調味，落蜆快炒兜勻
4. 落少半碗水煮至蜆開口，再落粉絲煮一陣，熄火加入九層塔，(九層塔卒下會出味d)焗一陣，完成

南瓜粟米栗子豬展湯

集合左咁多種蔬菜既湯，非常之有營養，亦益處多多，因為加入左栗子，所以冇落蜜棗都已經好甜喇

材料：

南瓜      半個 

栗子      半斤

紅蘿蔔   1條

粟米      2條

豬展     ＄30

南北杏  適量

做法：

1. 滾水煮栗子大約5分鐘，去殻去皮，備用

2. 豬展出水，備用

3. 南瓜、紅蘿蔔、粟米切件

4. 水滾將所有材料加入，煲2小時，完成

Rainbow Jelly

Jelly唔難整，但要整咁多層，絕對係心機之作，一層凝固左先再整第二層，淨係整呢幾隻色，已用了大半日既時間

原先最頂個層係紅色，但我買錯左荔枝味，所以變左透明色，哈哈...唯有下次再有時間先整過啦

薑汁臘腸炒芥蘭

成日聽人講，秋風起食臘味，見今日天氣涼涼地，就整薑汁臘腸炒芥蘭先

材料：
芥蘭 半斤
臘腸 2條
薑片 2塊
薑汁 1湯匙

做法：
1. 芥蘭洗淨，切段
2. 臘腸隔水蒸7分鐘，切片
3. 落油爆香薑片，芥蘭，再灒薑汁兜勻，放上臘腸，完成

檸蜜雞翼

酸酸甜甜既檸蜜雞翼，大人及小朋友都好喜歡，每次煮親雞翼都大受歡迎，而且見到你食得津津有味，確實大喜呢

材料：

雞翼   10隻

蠔油   1湯匙

茨汁：

青檸   1個

蜜糖   1湯匙

蠔油   半湯匙

做法：

1. 洗淨雞翼，停乾水，抹乾身

2. 落蠔油拌勻雞翼，再放入雪櫃大概醃30分鐘

3. 將雞翼煎到兩邊金黃色，大概8成熟

4. 將已準備既茨汁拌入，收汁後至全熟即可上碟，完成

清酒大蜆蒸蛋

參考鬼嫁老師食譜，之前試整過一次，酒味太濃，所以有少少更改，想容易成功，有2樣要注意喔

- 火一定要細，蒸出黎既蛋才滑

- 蒸完蜆要檢查一下仲有冇沙，如有必須沖洗乾淨

材料：

雞蛋           2隻

大蜆           1斤

雞湯           100ml

煮蜆水       120ml

日本清酒    20ml

做法：

1. 蜆洗淨，放隻鐵匙吐沙

2. 蜆隔水蒸8分鐘至全開

3. 隔沙，倒出120ml 蜆水來蒸蛋

4. 120ml 蜆水混和100ml 雞湯，再加20ml 清酒 (總之總液體量是 240ml)，加入已打勻的雞蛋，再拌勻

5. 蜆放入碟，加入已過篩的蛋漿

6. 包保鮮紙隔水蒸小火8分鐘，完成

最後灑上蔥花

瑤柱蝦米炆節瓜

好耐冇煮飯喇，呢個11月真忙碌，晚晩出街食，連老公都有投訴呢，早前去日本買左些靚靚瑤柱，今晚終於可以大派用場

材料：

瑤柱  2粒

蝦米  適量

節瓜  2條

做法：

1. 瑤柱丶蝦米，洗淨，浸軟約2小時

2. 撕碎瑤柱，留瑤柱，蝦米水備用

3. 節瓜去皮切半再切粗條

4. 落少許油炒節瓜，再落1茶匙糖及1湯匙蠔油兜均

5. 倒入瑤柱，蝦米水，加入瑤柱絲丶蝦米煮至滾起，蓋上蓋轉細火炆焗至節瓜淋，完成

Lily & Stephanotis wedding cake

最後一個畢業蛋糕，話咁快讀完了4個course，總算完成了想做多年的事

茄汁大蝦

酸酸甜甜有汁既餸，老公就最喜歡，茄汁大蝦就符合哂資格啦，做法亦十分簡單，短時間就開飯嚕

材料：

大蝦   8隻

汁料：

茄汁   3湯匙

黃糖   3茶匙

老抽   少許

做法：

1. 大蝦洗淨，剪去蝦鬚，備用

2. 茄汁丶黃糖、老抽再加半碗水，拌勻

2. 蝦煎到8成熟就將汁料倒落去煮多一陣，杰身上碟，完成

粉葛章魚鮑魚骨湯

上星期返外家晚飯，媽媽煲了此款湯比我飲，飲完覺得好甜好好飲，即時請教媽媽用左乜野材料，到今日終於有時間可以煲，老公KO左2大碗...哈哈

材料：

粉葛      

馬蹄       6粒

紅蘿蔔   1條

蜜棗       2粒

章魚       1塊

鮑魚骨   ＄25

做法：

1. 鮑魚骨洗淨，出水，備用

2. 粉葛，馬蹄，紅蘿蔔去皮，切件

3. 水滾將所有材料加入，煲2.5小時，完成

鹽麴親子丼

親子丼，即滑蛋雞肉飯，是我最喜愛的日本丼！親子丼包含雞肉和雞蛋，像母親和兒子一樣。雞肉配上滑蛋，送飯一流

材料 : 

雞脾肉                 2塊

鹽麴                     2湯匙 

洋蔥                     1隻

雞蛋                     3隻

油                        1茶匙

糖                        1茶匙 

醬油                     2湯匙

味醂                    1湯匙  

鰹魚高湯             1/2碗

蔥粒                     

紫菜絲                 

 

做法：

1. 雞肉用鹽麴和糖醃約30分鐘

2. 雞蛋輕輕打勻，備用

3. 洋蔥切絲，備用

4. 冷鍋下油，中小火燒熱煱，將洋蔥放入炒香

5. 將雞肉放入炒片刻至半熟

6. 將糖、醬油、味醂、鰹魚高湯、蔥粒放入，略拌，用小火煮約10分鐘              

7. 煮滾後，淋上蛋汁，用小火煮約2分鐘

8. 放在白飯上，灑上紫菜絲、蔥粒，完成

雪梨蘋果海㡳椰

踏入秋天，感覺成個人都好乾燥，皮膚同嘴唇都好乾，係時候要煲返d滋潤糖水飲下，煲完可將雪梨蘋果壓成茸，一齊飲，超潤

材料：

蘋果          3個

貢梨          3個

乾海底椰  少量

冰糖         少量

南北杏      少量

做法：

1. 蘋果，貢梨去皮去芯，切塊

2. 水滾將所有材料加入，煲2小時，再落冰糖調味，完成

五香蒜蜜雞翼

 

雞翼真係可以千變萬化，配搭不同既醃料，做出多花款既菜式，今次用了五香粉，材料簡單，好吃到一隻接著一隻，五香粉既獨特味道，估不到配上蜜糖雞翼非常夾，大家亦可早一日醃定，隨時都可以焗黎食

材料：
雞中翼  10隻

醃料：
五香粉   半湯匙
醬油       1湯匙
糖           1茶匙
蒜蓉       少許
蜜糖       少許

做法：

1. 雞翼洗淨抹乾，備用
2. 雞翼最少醃1小時以上
3. 預熱焗爐，雞翼底向上，塗少少蜜糖，180度焗10分鐘，反轉雞翼焗10分鐘，完成

桂花糖漬小蕃茄

今次唔用白糖，改左用黑糖，冇咁甜之餘感覺亦健康左，食落散發著好香既黑糖味

材料：

小蕃茄       1盒

檸檬皮碎   半個

檸檬汁       3湯匙

桂花糖       3湯匙

黑糖           2湯匙

做法：

1. 小蕃茄洗淨，開邊切成4份

2. 加入檸檬皮碎、檸檬汁、桂花糖、黑糖，撈勻，放入玻璃器皿

3. 雪櫃雪過夜，完成

Fondant roses cake

Course 3喇，亦係我最期待既課程之一，係學何謂Fondant & Gum Paste之分別，雖然2樣野既樣貌好相似，但就一定不可弄錯，完成呢個考試蛋糕，我終於明白到街買既Fondant cake點解會咁貴，因為真係雖要好多時間及心機去製作，單單整呢十幾朵玫瑰花已經用左差不多7小時去完成，期待下星期Course 4既課程

合掌瓜無花果鮑魚骨湯

天氣開始慢慢步入秋天，呢段時間要煲返d清潤既湯水，合掌瓜加無花果既配搭就最適合不過

材料：

合掌瓜         2個

乾無花果     4粒

鮑魚骨        ＄30

南北杏        適量

蜜棗            2粒

做法：

1. 將所有材料洗淨，鮑魚骨出水，洗淨、備用

2. 合掌瓜去皮，切件，無花果切半

3. 水滾起將所有材料加入，煲2.5小時，完成

薑蔥炒蟹

老公知道我喜歡食蟹，就叫我教佢點整，自從學識左之後，就成為佢既拿手小菜

尋晚佢同朋友去捉魚，竟有意外收穫，就係2隻大肉蟹，回到家滿心歡喜告訴我，話今晚用黎煮薑蔥炒蟹，隻蟹大大隻，啖啖肉，好味到大家連d汁亦不放過，哈哈

材料：

蟹　　    　2隻

薑片　　　大量

蔥段　　　大量

調味料：

鹽　       1茶匙

糖           1茶匙

生抽       1茶匙

生粉　　1茶匙

米酒    　1/2茶匙

蠔油　    1茶匙

麻油　    少許

胡椒粉　少許

做法：

1. 花蟹用擦擦乾淨蟹殼，去肺及蟹內兩邊不能食用的部份，斬切瀝乾水份備用

2. 燒熱油鑊，在蟹上撲上生粉水，把蟹炸香，盛起備用

3. 燒熱油鑊，爆香蔥段和薑片，然後加入花蟹，鑊邊灒少許米酒

4. 落調味料，加入2湯匙水，蓋上蓋煮約2分鐘，再落蔥段兜勻，完成

泰式煎魚餅

好野味既泰式煎魚餅，少少辣，食時唧少少青檸汁加埋酸辣醬，正

材料：

鯪魚肉   $20

青豆角   4條

醃料：

紅咖哩醬    4茶匙

魚露           3茶匙

檸檬葉       4塊

生粉           3茶匙

水               1茶匙

胡椒粉       小許

做法：

1. 檸檬葉洗淨，用手捽一捽 ( 令到出味 )切碎

2. 青豆角切粒 

3. 鯪魚肉加入青豆粒及醃料搞勻撻幾下起膠，醃45 mins

4. 用湯匙畢起型成一個鯪魚球，放入鑊壓扁，煎至金黃，完成

南山邨1蚊魷魚、豬皮、魚旦

近排大熱既南山邨1蚊魷魚，雖然未親身去食過，但此食譜都好好食，真係要搵日去試食比較下，今次我亦加入左豬皮丶魚旦

豬皮索曬d汁，正

材料：

水魷        2-3磅

豬皮        1塊

豉油魚旦 1磅

蠔油        3湯匙

老抽        1湯匙

砂糖        1湯匙

韓式辣醬 2-3湯匙

麻油        少許

做法：

1. 豬皮丶魚旦出水，備用

2. 水魷用鹽卒下，清洗乾淨，隔乾水份，切大條

3. 白鑊燒熱落水魷(不用加水，因水魷會出水)

4. 調味醬拌勻加入，再加入豬皮丶魚旦，細火炆25mins 至醬汁收乾杰身，完成

龍脷葉枇杷葉石黃皮湯

老公病左，傷風感冒加上有少少咳，今日街市姐姐教我煲(龍脷葉枇杷葉石黃皮湯)話有助清熱潤肺，化痰止咳等功效，喉痛及支氣管炎等都有幫助，只要煲夠時間，此湯並不太寒涼，連我都啱飲，可作為預防咁話

材料：
龍脷葉 1兩
枇杷葉 5錢
南北杏 1兩
石黃皮 2兩
蜜棗 2粒
瘦肉 ＄30
果皮 1塊

做法：
1. 瘦肉出水，洗淨備用
2. 龍脷葉、枇杷葉、石黃皮洗淨，石黃皮切半
3. 凍水落果皮，滾起將所有加入，煲2小時，完成

Guinness黑啤炆牛肋條

一早解凍曬d牛肋條，先發現屋企冇曬紅酒，正想落街買之際，諗到雪櫃有罐黑啤，就試試用黎炆，試食完出奇地好食，好食過用紅酒炆，完全冇苦澀味，而且d酒蒸亦都會揮發曬，甜甜地仲有d似羅宋湯味

材料：

牛肋條              1包

洋蔥                  1個

甘旬                  1條

蒜頭                  2粒

西芹                  2條

Guinness黑啤   1罐

牛湯粒              1粒

水                     300ml

茄膏                  2湯匙

bay leaf             2片

百里香              1湯匙

黑糖                  1.5湯匙

鹽                      少許

做法：

1. 牛肋條出水，洗淨備用，落1茶匙鹽在牛肋條上醃10分鐘

2. 蒜頭，西芹和洋蔥切細粒，甘旬切大件備用

3. 鍋內燒熱1湯匙油，放入牛肋條煎至金黃色後盛起

4. 同一鍋內不用洗下蒜粒稍炒，加入洋蔥，西芹和甘旬兜勻約（5-6分鐘），倒入1罐黑啤酒，開中大火煮一回（3-4分鐘）令酒精蒸發

5. 牛肋條回鍋，倒入牛高湯蓋過牛肉表面，加入茄膏，香草，鹽和糖攪勻6. 滾後，轉細火炆2小時，完成

    或可放入焗爐160度焗2小時

Parma ham & Melon

好喜歡食Parma ham，它那種獨特既咸香味，配上Melon簡直係絕配

薯仔蛋沙律

薯仔蛋沙律有益又健康，整多少少明天下午都可以食

材料：
薯仔 2個
雞蛋 3個
粟米粒
車厘茄
比丘沙律醬
鹽
黑椒 

做法：
1. 薯仔去皮切大粒
2. 薯仔及蛋烚熟，蛋去殼切粒
3. 加鹽同黑椒調味，再加比丘沙律醬拌勻，完成

柚子味噌雞翼

之前好朋友去旅行，買左柚子味噌比我做手信，仲教我點整雞翼，我同老公食完都覺好好味，多謝你（小con）

材料：
雞翼 10隻

調味：
鹽麴/醬油麴 1湯匙
柚味噌 1.5湯匙
檸檬汁 1茶匙
料理酒 1茶匙

做法：
1. 雞翼解凍抹乾水份，落所有調味拌勻
2. 醃1小時以上
3. 焗爐預熱180度，雞翼底向上，塗上柚子味噌焗10 mins 後，反轉雞翼塗上味噌，200度焗至金黃色，完成

椰奶凍

早前同朋友夾份買左d玫瑰花模，今日終於有時間整甜品，奶凍脫左模好靚呀，最後加埋金箔係面，即刻高貴哂

材料：
椰漿 60ml
牛奶 150ml
淡忌廉 100ml
魚膠粉 12g
糖 35g

做法：
1. 魚膠粉倒入凍水，用熱水坐溶備用
2. 牛奶倒入煲，加入椰漿，淡忌廉，糖，用細火煮至糖溶解（不用煮滾）
3. 加入已溶化的魚膠粉，攪拌熄火
4. 等椰奶液凍左就倒入模中，放入雪櫃雪至凝固，完成

砵酒燉牛尾

諗黎諗去都唔知煮乜好，落去超市逛逛，看見牛尾幾新鮮，好...今日就炆牛尾，呢味餸無需任何技巧，做法亦不難，要的只是時間

材料：

牛尾       6件

洋蔥       1個

蕃茄       2個

甘荀       1條

百厘香    3條（或1湯匙乾的）

迷迭香    3條（或1湯匙乾的）

香葉        3片

砵酒        200ml

茄膏        2湯匙

牛湯粒    1粒  

水           400ml

鹽及胡椒    少許

做法：

1. 牛尾出水洗淨，備用

2. 甘荀蕃茄切大件， 洋蔥切粗條


3. 水煮溶牛湯粒，將所有材料加入，拌勻

4. 滾起後小火燉煮1.5 小時，焗1小時，再小火燉煮1小時

5. 最後隔去多餘油份，以鹽及胡椒來調味，完成

日式芝士杯子蛋糕

熱食鬆軟，雪凍食亦非常滑及creamy，放上新買既紙杯裏，送比朋友靚曬

材料：

低筋粉      20g

蛋黃          3個

蛋白          3個

糖             40g x 2份 

粟粉          20g

淡忌廉      100g

忌廉芝士   200g

做法：

1. 180度預熱焗爐，蛋白放冰箱雪15mins

2. 取出蛋白，分2次加入1份砂糖打至挺立狀，放入雪櫃，備用

3. 將忌廉芝士打至軟身，分2次加入1份砂糖打至奶白色

4. 加入蛋黃及淡忌廉再打勻

5. 篩入粟粉及低筋粉輕輕拌勻

6. 將蛋白分幾次加入忌廉芝士蛋黃漿輕輕拌勻，倒入紙杯內

7. 把熱水倒入大焗盤內，再放上焗盤及紙杯

8. 120度焗15分鐘，再調較至150度焗15分鐘至上色，完成

藥材湯

小時候媽媽經常煲藥材湯比我飲，此湯補氣健脾，補而不燥，間唔中飲下，可增強免疫力

材料：

北芪  3塊

黨心  4條

圓肉

杞子

茨實

豬展   $39

做法：

1. 所有材料浸洗乾淨

2. 豬展出水

3. 將所有材料加入，煲3小時，完成

香辣茄汁雞翼

香濃既汁料，味道辣辣地，老公大愛呀，話好食過Pizza XXX

材料：
雞翼 12隻
蒜頭 2粒

汁料：
茄汁 4湯匙
Tabasco 2湯匙
糖 1湯匙
水 1碗

醃料：
鹽 1茶匙
胡椒粉 1茶匙

做法：
1. 雞翼洗淨，用醃料醃半小時
2. 燒紅鑊滾油，中火煎香雞翼兩面 (不用煎熟)
3. 落汁料煮滾
4. 慢火炆約15分鐘
5. 落糖丶鹽調味，兜勻雞翼至收汁，完成

 

 

 

 

 

----------------------------------------------------------------------------------

 

 

 

 

如喜歡，請來我的Facebook 專頁 Like一下吧!

 

K.T.Kitchen Facebook專頁

 

 

 

 

版權均屬K.T.Kitchen所有, 如要轉載請列明出處, Thanks!