木瓜紅蘿蔔粟米海底椰素湯

第一次煲素湯，估唔到冇落肉都好清甜又好飲，食埋啲湯渣唔做大嘥鬼，營養豐富，又健康

材料：

木瓜       半個

紅蘿蔔    1條

粟米        1條

海底椰    6片

腰果        2両

蜜棗        1粒

龍王杏 

做法：

1. 所有材料洗淨

2. 木瓜、紅蘿蔔、粟米去皮切件

3. 水滾起，放入所有材料，煲3小時，完成

魚肉釀豆卜炆白蘿蔔

小老闆一日一日長大，開始需要人陪伴同埋有自己既脾氣，所以要諗d簡單既家常小菜煮，最重要係要快煮完...哈哈

呢幾日天氣開始轉涼，煮完呢味餸原煲上枱，食到尾都仲係熱辣辣，讚呀

材料：

鯪魚肉  ＄20

豆卜      10粒

白蘿蔔   1條

雞湯       250ml

做法：

1. 豆卜浸滾水一陣，壓乾後一開二，塗少少粟粉釀入鯪魚肉

2. 開火煎香魚肉嗰面先，再煎豆卜面一陣，盛起備用

3. 落油爆香薑蒜，再落白蘿蔔炒，然後再落史雲生雞湯，滾起細火炆45mins

4. 白蘿蔔轉成透明，最後落豆卜魚肉，加入少許豉油、少許糖，完成

梅菜蒸鯇魚

平時蒸鯇魚有時候都總會有啲泥腥味，加埋梅菜一齊蒸，除咗僻咗啲腥味，撈飯食仲好好味tim 

材料：

鯇魚腩   $20

梅菜       1棵

薑絲 

醃料：

麻油 少少

糖     2茶匙

做法：

1. 梅菜浸洗到無沙，再用手榨乾水，將梅菜切碎
2. 麻油、糖加入梅菜撈勻醃15分鐘
3. 洗乾淨鯇魚，抺乾水放喺碟度，再鋪薑絲及醃好嘅梅菜，隔水蒸7分鐘
4. 最後讚熟油、豉油，完成

蓮藕鱆魚花生眉豆雞腳豬骨湯

突然間好想飲蓮藕湯，記得小時候媽媽間唔中都會煲，呢d老火湯真係充滿媽媽的味道

挑選蓮藕時選擇帶有泥的蓮藕，藕身要肥大筆直，裡面長有許多氣洞者為佳，蓮藕含有豐富的鐵質，蛋白質，又能補血

材料：

蓮藕   2節

鱆魚   1塊

雞腳   4隻

豬骨  ＄35

蜜棗   2粒

花生

眉豆

做法：

1. 蓮藕去泥、去皮，切片備用
2. 豬骨、雞腳、鱆魚，出水洗淨
3. 花生、眉豆、蜜棗，洗淨
4. 水滾起，加入所有材料，煲3小時，完成

8號風球的窩夫

打風最好既節目就係整野食，趁小老闆瞓左就要喳喳淋開工，諗住整蛋糕之際，打開櫥櫃見到之前買左包預伴粉，咦...整呢個好喎，短時間就整好，哈哈...包預伴粉今日可以大派用場啦，材料十分簡單，1包粉，1隻蛋，120ml牛奶拌勻，放置20分鐘就用得，非常方便

紅蘿蔔粟米栗子百合豬𦟌湯

入秋最好煲返d清潤既湯水飲，此湯含有豐富營養同植物纖維，健脾益胃，清甜又清潤

材料：

栗子     半磅

百合      1両

粟米      1條

紅蘿蔔  1條

蜜棗      2粒

豬𦟌      $30

南北杏 

做法：

1. 所有材料洗淨，豬𦟌出水

2. 滾起細火煲3小時

冬蟲夏草鮑魚雞湯

好耐冇出post喇，自從屋企多左個小老闆，就周身唔得閒，日日都好似要同時間競賽咁，雖然日日都好忙，但見到你開心、健康、快樂地成長，什麼都是值得的，講返正題先，以前d長輩成日話坐月坐得好，之後身體都會好，呢句說話我而家深深體會到，坐月既時候請左個好幫手陪月姨姨協助我坐月，由以前怕凍又面冇血色的我，到而家唔再成日覺得凍同埋面色紅潤左，她既功勞也不少

呢款湯滋補養陰，冬蟲夏草有調節免疫系統功能、抗腫瘤、抗疲勞等多種功效

材料：

冬蟲夏草  10條

紅棗          4粒

圓肉          10粒

杞子          15粒

淦旗片       2片

淮山          3片

黨參          2條

鮑魚          2隻

雞              1隻

做法：

1. 所有材料洗淨，鮑魚、雞出水，備用

2. 除杞子外，所有材料凍水落，滾起轉慢火煲3小時

3. 最後1小時落杞子，完成

Strawberry smoothie

市面上有好多種希臘乳酪，要食得健康一定要揀高蛋白質、低碳水化合物、低糖分既乳酪，而Fage Greek yogurt 係 zero fat，亦係我既favourite yogurt

乳酪是在牛奶中添加乳酸菌，並經過發酵製成的，所以其比牛奶更容易消化。是很有益的高鈣食品，一杯乳酪能提供一天所需鈣質含量約30%，有助預防骨質疏鬆症；而所含的益生菌被人體吸收後，能清除腸道的垃圾，發揮抗菌、抗過敏、護肝、增強免疫力、降低膽固醇，還有美容的功效

材料：

大粒士多啤梨  4粒

牛奶              10ml

Fage Greek yoghurt  

蜜糖

做法：

1. 士多啤梨洗淨、切粒，雪冰

2. Blender 放入士多啤梨，yoghurt，牛奶及蜜糖，一齊blender，完成

益力多芒果沙冰

夏日炎炎，最好飲返杯冰凍既益力多芒果沙冰，買左Vitantonio blender 咁耐，終於可以大派用場喇，飲完簡直係透心涼呀

材料：

芒果      半個

益力多  2枝

做法：

1. 芒果去皮切粒，放入冰箱雪冰

2. blender放入芒果粒粒，再加2枝益力多，一齊blend，完成

PS：想飲既時候有口感，不要blend太耐，或者可以加入芒果粒粒

蝦醬豆卜蒸豬腩肉

媽媽餸必備菜式之一，好味又易整，好下飯喔

材料：

豆卜      ＄5

豬腩肉   ＄25

做法：

1. 豬腩肉、豆卜洗淨，豬腩肉切薄片，豆卜切半

2. 豬腩肉用蝦醬，酒，糖，粟粉拌勻，醃30分鐘

3. 豆卜舖底，放上豬腩肉片，隔水蒸15分鐘加葱花，完成

三杯雞

三杯雞名字的由來，即係用3種醬汁煮成的，分別為米酒，麻油，醬油用1比1的比例，再加入九層塔及辣椒仔將味道提升

材料：

泰安雞     半隻

九層塔     2-3棵

薑           5片

蒜片

紅蔥頭片

紅辣椒仔  1條切粒

醬汁：

米酒    30ml

麻油    30ml

生抽    30ml

冰糖    1細粒

做法：

1. 洗淨雞件

2. 落麻油至油熱，爆香薑片，紅蔥頭，蒜片

3. 放入雞件，雞皮向下，煎至金黃色

4. 倒入米酒、生抽、冰糖、辣椒粒，滾起後轉最細火，蓋上蓋煮至雞熟

5. 熄火，卒下九層塔，令到九層塔出味兜均，完成

檸蜜脆雞扒

天氣開始熱，食啲酸咪咪既餸就最開胃，用檸檬汁加蜂蜜整左個檸蜜汁，酸甜度自己調較，簡單又好味

材料：

雞扒    2塊

蛋白    1隻

粟粉    適量

醃料：

胡椒粉    少許

鹽            少許

生抽        少許

紹酒        半湯匙

汁料：

檸檬     1個

蜂蜜     適量

粟粉     適量

水         適量

做法：

1. 雞扒解凍後剪去肥膏，洗淨印乾水份，用醃料醃3小時

2. 雞扒沾上蛋白，再撲上薄薄一層粟粉，先將雞皮一面煎至金黃，再反轉另一面煎熟，拎起將雞扒放在廚紙上印走多餘油份

3. 洗淨檸檬，將檸檬磨皮只要黃色部分，再榨汁備用

4. 將檸檬汁及蜂蜜倒入煲仔中，用細火邊煮邊調較至合適既味道，最後加入適量粟粉水煮至杰身即可

5. 雞扒切件，灑上檸檬皮茸，再淋上檸蜜汁，完成

泰式豬頸肉

每次出街食泰國菜都必點既豬頸肉，要整得好食，個醬汁真係好緊要，呢個萬用醬汁除左用係豬頸肉，亦可以用係其他冷盤菜式度

  

材料：

豬頸肉 1塊

麥芽糖 1.5湯匙 + 小小水(座暖) 

醃料：

老抽  1/4杯

魚露  2湯匙

米酒  小小

砂糖  1-2 湯匙

醬汁：

青檸汁     1個

魚露         2湯匙

乾蔥碎     1.5湯匙

蒜蓉         1.5湯匙

檸檬葉     小小

白醋         1湯匙

指天椒     1隻

芫茜         小小

做法：

1. 豬頸肉洗淨抹乾，將醃料拌勻放入豬頸肉最少醃3小時

2. 醃好豬頸肉放入預熱180度焗爐，每邊焗15分鐘

3. 再塗上麥芽糖每邊焗多10分鐘，逆紋切件上碟，完成 

鹹蛋馬蹄麥皮蒸肉餅

肉餅加入麥皮，感覺健康之餘，亦令到肉餅質感鬆軟多汁，第一次用呢個方法，估唔到係咁好食，極速清哂

材料：

肉碎      ＄20

馬蹄      4粒

鹹蛋      1隻

醬油麴   1湯匙

豉油       1湯匙

糖           1茶匙

紅色桂格麥皮   1湯匙

做法：

1. 馬蹄去皮，切碎，鹹蛋蒸熟，鹹蛋黄切粒、備用

2. 肉碎加入麥皮及水各1湯匙拌勻，再落1湯匙醬油麴拌勻醃10分鐘

3. 落1湯匙豉油，1茶匙糖拌勻，再落馬蹄粒拌勻，放入雪櫃

4. 蒸前再落半湯匙粟粉拌勻，隔水蒸15分鐘

5. 將鹹蛋黃切碎放上肉餅面，完成

墨魚滑釀去骨雞翼

做法唔難、材料簡單，係要心機同時間去骨，食既時候啖啖肉，爽呀

材料：

雞翼                10隻

調味墨魚滑    4両

粟米粒         適量

調味：

韓式燒烤醬 （辣味） 2湯匙

韓式辣醬                      1湯匙

蜜糖                              適量

做法：

1. 雞翼剪去頭尾，起骨後，粟米粒及墨魚滑拌勻，釀入粟米粒墨魚滑，手指濕小小水按實開口位置

2. 調味料伴勻，加入雞翼醃1小時

3. 180度預熱焗爐，雞翼底向上放入焗爐，焗12分鐘，再反轉焗12分鐘

4. 出爐將所有雞翼底面揸上蜜糖，完成

沙爹金菇肥牛粉絲煲

整粉絲煲最緊要係有一樽好味既沙爹醬，試過用其他牌子都唔及jimmy's既沙爹醬好食，粉絲索哂d沙爹汁，正到老公都要食2碗飯

材料：

肥牛   半磅

金菇   1包

粉絲   1包

蒜頭    2片

薑        1片

Jimmy's沙爹醬  2湯匙

牛肉調味： 

豉油      1茶匙

糖          1茶匙

麻油     1茶匙

豆粉      1茶匙

胡椒粉  少少

做法：

1. 先將牛肉調味， 醃一個鐘

2. 粉絲用水浸軟，剪段

3. 爆香蒜頭、薑，落牛肉，大半碗水，沙爹醬，金菇，最後落埋粉絲

5. 牛肉熟後，完成

馬拉盞炒芥蘭

少少辣好惹味，下次再加埋蝦米仔，應該會更好

材料：

芥蘭           半斤

免治豬肉   ＄10

辣椒仔       2隻

馬拉盞       1.5湯匙

蒜頭

蔥頭

做法：

1. 用油爆香蔥頭、蒜、辣椒仔，加入免治豬肉落鑊炒散，落少少豉油調味

2. 將炒好的肉碎盛起

3. 原鑊落少少油，開細火，將馬拉盞炒散炒出香味

4. 轉大火，倒入芥蘭炒略炒幾下，再倒入肉碎炒熟，完成

沙茶醬豬頸肉炒翠肉瓜

翠肉瓜想煮得好食，而又不想炒到水汪汪，秘訣係出左水先至炒，咁就可以被免翠玉瓜炒得耐而出太多水，因為翠玉瓜本身含大量水份，炒得太耐熱力就會將啲水份迫哂出嚟

材料：

豬頸肉  1塊

翠肉瓜  1條

調味料：

沙茶醬 半湯羮

生抽     半湯羮

糖         1/2茶匙

做法：

1. 豬頸肉切片然後用調味料醃半小時備用，翠肉瓜切件，出水備用

2. 熱油鑊炒豬頸肉至八成熟，先盛起，原鑊再炒翠肉瓜，炒一陣加入豬頸肉加少許水兜一兜，然後蓋上蓋煮3分鐘左右，開蓋再炒一炒，完成

香蔥午餐肉蛋卷

近期網上大熱既香蔥午餐肉蛋卷，我也湊熱鬧整埋一份，用左韓國既午餐肉，再加入少少調味已經好好食

材料：

蛋         4隻

午餐肉   1罐

蔥粒

調味料：

胡椒粉

黑椒粒

鹽

做法：

1. 午餐肉、蔥切成粒粒，午餐肉煎香

2. 打蛋，加入蔥粒、胡椒粉、黑椒粒、鹽及午餐肉拌勻

3. 煎pan放少少油，油熱轉細火，落少少蛋漿快手浪成薄薄一層，蛋漿開始凝固向上摺一半，再落少少蛋漿，重覆至蛋漿用完，四面煎至金黃

4. 切成一段段，上碟完成

粟米肉粒飯

去完街返屋企，又要快手快腳準備晚餐，想快靚正，就整個茶餐廳快餐精選，粟米肉粒飯，簡單又好味

材料：

Sweet corn cream style  1盒

鹽           少許

糖          半茶匙

水           1碗

梅頭肉   ＄15

蛋            1隻

生粉水

做法：

1. 瘦肉洗淨切粒粒，加少少鹽及粟粉醃一陣

2. 1盒Sweet corn cream style加水煮滾

3. 將肉粒加入，煮到肉粒熟後就加少許鹽及半茶匙糖調味

4. 如果未夠杰，就落生粉水，逐少加入，邊煮邊攪，最後加入蛋，完成

栗子雞飯

呢幾日又凍返，最啱就係整個栗子雞飯食喇！栗子嘅碳水化合物可以幫助人體產生熱能，雞脾肉又含有豐富嘅蛋白質可增強體力

簡簡單單煮多個菜，又開飯lu

材料：

栗子        10粒

雞脾肉    2塊

雞肉醃料：

油            適量

豉油        適量

麻油        適量

糖            適量

生粉        適量

做法：

1. 栗子去殼去衣切粒、雞肉切粒醃好，備用 

2. 栗子烚熟

3. 電飯煲煲飯，最後10分鐘加入已烚熟栗子、雞肉粒

4. 煮好後，再焗10分鐘開蓋，將所有材料放入碗內，灑上蔥花，完成

腐乳蒸雞

冬天用buffet蒸野真係一流，原煲上除左外貌吸引之外，亦有內涵，食到尾d餸仲熱辣辣

用腐乳醃雞、味道濃香，d雞又滑又惹味！

材料：

雞脾肉      2塊

西蘭花        1棵

調味料：

廖孖記腐乳 3磚

老抽          1茶匙

蒜蓉          1茶匙

糖             1茶匙

辣豆板醬    1茶匙

紹興酒       1湯匙

生粉          1茶匙

1. 雞脾肉洗淨切件，抹乾，加入調味料，醃30分鐘

2. 西蘭花洗淨切好，圍邊

3. 舖醃好雞脾肉在中間

4. LC無水蒸：加蓋，中火6分鐘，小火6分鐘，熄火焗5分鐘 (或隔水蒸15分鐘)，最後灑上蔥花，完成

香茅青檸薑蜜

呢排成日落雨又咁凍，整返杯香茅青檸薑蜜，當作預防感冒都好

香茅功效：有預防治療感冒、散寒利濕、清除疲勞之效

材料：

香茅   4支

青檸   半個

薑       4片

蜜糖   1湯匙

水       5碗

做法：

1. 香茅用刀背拍扁切段，薑去皮切片

2. 水滾後放入香茅和薑，大滾10分鐘再熄火蓋上蓋焗至和暖

3. 青檸渣汁先放在杯內，再倒入香茅薑水，最後放入蜜糖攪均，完成