蒜蓉蒸花竹蝦

休魚期開始左已經冇買蝦食，一來價錢貴，二來好細隻，今日逛街市，終於見到有大大隻既花竹蝦賣喇，yeah...

材料：

花竹蝦     7隻

蒜蓉 

蔥頭 

蔥花

做法:

1. 洗淨蝦去腸，花竹蝦背面舖上蒜蓉

2. 大火蒸花竹蝦7分鐘，灑上蔥花

4. 煮滾油放蒜蓉， 蔥頭，少少糖及豉油 ，淋上蝦面，完成

金銀花菊花龍眼花蜜茶

天氣炎熱，煲金銀花可清熱解毒、杞子護眼，而菊花能消暑止渴，好適合夏天飲，記住杞子不可以一早落，因為有機會會變酸的，最後落埋蜜糖，甜甜地，好過飲汽水啦

金銀花菊花龍眼花蜜茶

材料：

金銀花    半兩

菊花        一兩

杞子        15粒

水            12碗

龍眼花蜜糖 

 做法：

1. 將金銀花、菊花、杞子浸洗乾淨

2. 落金銀花、菊花，大火煲滾轉小火煲20分鐘，最後落杞子煲多15分鐘，熄火

3. 攤涼後加入龍眼花蜜糖，完成

富士山肉餅

工人姐姐漸漸熟習環境，所有野都慢慢開始上手喇，而我d時間又多返少少，可以煮下d新菜式，再唔係蕃茄炒蛋、炒菜咁悶，呢個富士山肉餅我都係第一次整，除咗個外型，其實同平時蒸肉餅一樣呢...哈哈

富士山肉餅

材料 ：

肉碎       $30

鹹蛋       1隻

馬蹄       6粒

蔥              

醃料：

鹽              半茶匙

糖              2茶匙

粟粉          3茶匙

生抽           2茶匙 

麻油           少許

胡椒粉       少許

酒              少許

水              4湯匙（最後續少邊攪拌邊倒入）

做法 :

1. 鹹蛋清洗乾淨，分開蛋白及蛋黃

2. 馬蹄去皮、切粒

3. 肉碎加入水以外的醃料拌匀，最後續少加水並攪拌，加入馬蹄再拌勻，醃1小時

4. 堆積成小山型，頂位做成一個小凹位，蒸8分鐘

5. 熄火打開鑊蓋，從頂淋上鹹蛋白，頂位置放上原隻鹹蛋黃，繼續蒸約12分鐘，蒸好灑下蔥粒，熄火焗1-2分鐘，完成

冬瓜波波蜆夜香花湯

媽媽話今日大暑一定要煲冬瓜湯呀，唔講我都唔知添...哈哈，買齊材料，滾返個冬瓜波波蜆夜香花湯，大小老闆齊齊飲，消消暑

冬瓜波波蜆夜香花湯

材料：

冬瓜        斤半

波波蜆     1斤

夜香花    ＄5

粉絲         1紥

瘦肉        ＄15

薑             2片

咸蛋白     1個

做法：

1. 夜香花浸洗乾淨備用，冬瓜去核切大粒備用

2. 粉絲用水浸軟，瘦肉切片

3. 滾水落花甲，微微張開口就盛起，用水喉水沖乾淨備用

4. 落薑片，滾起落冬瓜煲到半透明，再加瘦肉滾一陣，落埋花甲、粉絲及咸蛋白，熄火落埋夜香花，完成

冬瓜去濕湯

近排成日落雨，又濕濕立立咁，煲返個冬瓜去濕湯飲下，清下d濕熱

去濕料可以到藥材鋪執，簡單方便，入面包括有燈芯花，木棉花，生熟薏米，扁豆，赤小豆等等。有利去水去濕之效用，好適合呢d潮濕既天氣飲

冬瓜去濕湯

材料：

冬瓜           1斤

去濕湯料   1包

蜜棗           2粒

豬骨           $40

做法：

1. 去濕湯料洗凈，瀝乾水份、備用

2. 冬瓜洗淨，去囊切粗塊，保留冬瓜皮

3. 豬骨出水，洗淨、備用

4. 所有材料加入，煲3小時，加鹽調味，完成

肉碎蒸豆腐

天氣熱辣辣，逗留廚房一陣都已經成頭大汗，整個簡簡單單又好味既肉碎蒸豆腐，重點係要快開飯呀...哈哈

材料：

肉碎                  $15

百福蒸煮豆腐  1盒

蒜蓉                  1湯匙

蔥粒                  2湯匙

醃料：

生抽      1湯匙

糖          1茶匙

胡椒粉  少許

麻油      少許

生粉      半茶匙

 做法：

1 . 肉碎醃15分鐘

2. 豆腐洗淨、印乾水、切片，蒸6分鐘

3. 落油燒熱鑊，加入蒜蓉炒，再加入醃好的肉碎，炒至熟透

 4. 將肉碎舖上蒸好的豆腐上面，灑上蔥粒，完成

無花果雪梨薏米水

老公病咗一星期有多喇，見佢晚晚咳到咁辛苦，做老婆既梗係要煲返d滋潤既野俾佢補一補，用無花果配雪梨煲水飲十分滋潤，加埋鴨梨更可增強潤肺功效添

呢排落雨又潮濕，落埋生熟薏米去下濕先

無花果雪梨薏米水

材料：

鴨梨           3個

無花果       6粒

生熟薏米   ＄3

冰糖 少許

水 

做法：

1. 生熟薏米浸一小時，無花果略沖洗剪半，鴨梨去皮芯切件

2. 所有材料大火滾起後煲10分鐘，再小火煲50分鐘，最後落冰糖調味

3. 最後將雪梨blend爛，唔浪費食物之餘，仲會更加好味

木瓜紅蘿蔔粟米海底椰素湯

第一次煲素湯，估唔到冇落肉都好清甜又好飲，食埋啲湯渣唔做大嘥鬼，營養豐富，又健康

材料：

木瓜       半個

紅蘿蔔    1條

粟米        1條

海底椰    6片

腰果        2両

蜜棗        1粒

龍王杏 

做法：

1. 所有材料洗淨

2. 木瓜、紅蘿蔔、粟米去皮切件

3. 水滾起，放入所有材料，煲3小時，完成

魚肉釀豆卜炆白蘿蔔

小老闆一日一日長大，開始需要人陪伴同埋有自己既脾氣，所以要諗d簡單既家常小菜煮，最重要係要快煮完...哈哈

呢幾日天氣開始轉涼，煮完呢味餸原煲上枱，食到尾都仲係熱辣辣，讚呀

材料：

鯪魚肉  ＄20

豆卜      10粒

白蘿蔔   1條

雞湯       250ml

做法：

1. 豆卜浸滾水一陣，壓乾後一開二，塗少少粟粉釀入鯪魚肉

2. 開火煎香魚肉嗰面先，再煎豆卜面一陣，盛起備用

3. 落油爆香薑蒜，再落白蘿蔔炒，然後再落史雲生雞湯，滾起細火炆45mins

4. 白蘿蔔轉成透明，最後落豆卜魚肉，加入少許豉油、少許糖，完成

梅菜蒸鯇魚

平時蒸鯇魚有時候都總會有啲泥腥味，加埋梅菜一齊蒸，除咗僻咗啲腥味，撈飯食仲好好味tim 

材料：

鯇魚腩   $20

梅菜       1棵

薑絲 

醃料：

麻油 少少

糖     2茶匙

做法：

1. 梅菜浸洗到無沙，再用手榨乾水，將梅菜切碎
2. 麻油、糖加入梅菜撈勻醃15分鐘
3. 洗乾淨鯇魚，抺乾水放喺碟度，再鋪薑絲及醃好嘅梅菜，隔水蒸7分鐘
4. 最後讚熟油、豉油，完成

蓮藕鱆魚花生眉豆雞腳豬骨湯

突然間好想飲蓮藕湯，記得小時候媽媽間唔中都會煲，呢d老火湯真係充滿媽媽的味道

挑選蓮藕時選擇帶有泥的蓮藕，藕身要肥大筆直，裡面長有許多氣洞者為佳，蓮藕含有豐富的鐵質，蛋白質，又能補血

材料：

蓮藕   2節

鱆魚   1塊

雞腳   4隻

豬骨  ＄35

蜜棗   2粒

花生

眉豆

做法：

1. 蓮藕去泥、去皮，切片備用
2. 豬骨、雞腳、鱆魚，出水洗淨
3. 花生、眉豆、蜜棗，洗淨
4. 水滾起，加入所有材料，煲3小時，完成

8號風球的窩夫

打風最好既節目就係整野食，趁小老闆瞓左就要喳喳淋開工，諗住整蛋糕之際，打開櫥櫃見到之前買左包預伴粉，咦...整呢個好喎，短時間就整好，哈哈...包預伴粉今日可以大派用場啦，材料十分簡單，1包粉，1隻蛋，120ml牛奶拌勻，放置20分鐘就用得，非常方便

紅蘿蔔粟米栗子百合豬𦟌湯

入秋最好煲返d清潤既湯水飲，此湯含有豐富營養同植物纖維，健脾益胃，清甜又清潤

材料：

栗子     半磅

百合      1両

粟米      1條

紅蘿蔔  1條

蜜棗      2粒

豬𦟌      $30

南北杏 

做法：

1. 所有材料洗淨，豬𦟌出水

2. 滾起細火煲3小時

冬蟲夏草鮑魚雞湯

好耐冇出post喇，自從屋企多左個小老闆，就周身唔得閒，日日都好似要同時間競賽咁，雖然日日都好忙，但見到你開心、健康、快樂地成長，什麼都是值得的，講返正題先，以前d長輩成日話坐月坐得好，之後身體都會好，呢句說話我而家深深體會到，坐月既時候請左個好幫手陪月姨姨協助我坐月，由以前怕凍又面冇血色的我，到而家唔再成日覺得凍同埋面色紅潤左，她既功勞也不少

呢款湯滋補養陰，冬蟲夏草有調節免疫系統功能、抗腫瘤、抗疲勞等多種功效

材料：

冬蟲夏草  10條

紅棗          4粒

圓肉          10粒

杞子          15粒

淦旗片       2片

淮山          3片

黨參          2條

鮑魚          2隻

雞              1隻

做法：

1. 所有材料洗淨，鮑魚、雞出水，備用

2. 除杞子外，所有材料凍水落，滾起轉慢火煲3小時

3. 最後1小時落杞子，完成

Strawberry smoothie

市面上有好多種希臘乳酪，要食得健康一定要揀高蛋白質、低碳水化合物、低糖分既乳酪，而Fage Greek yogurt 係 zero fat，亦係我既favourite yogurt

乳酪是在牛奶中添加乳酸菌，並經過發酵製成的，所以其比牛奶更容易消化。是很有益的高鈣食品，一杯乳酪能提供一天所需鈣質含量約30%，有助預防骨質疏鬆症；而所含的益生菌被人體吸收後，能清除腸道的垃圾，發揮抗菌、抗過敏、護肝、增強免疫力、降低膽固醇，還有美容的功效

材料：

大粒士多啤梨  4粒

牛奶              10ml

Fage Greek yoghurt  

蜜糖

做法：

1. 士多啤梨洗淨、切粒，雪冰

2. Blender 放入士多啤梨，yoghurt，牛奶及蜜糖，一齊blender，完成

益力多芒果沙冰

夏日炎炎，最好飲返杯冰凍既益力多芒果沙冰，買左Vitantonio blender 咁耐，終於可以大派用場喇，飲完簡直係透心涼呀

材料：

芒果      半個

益力多  2枝

做法：

1. 芒果去皮切粒，放入冰箱雪冰

2. blender放入芒果粒粒，再加2枝益力多，一齊blend，完成

PS：想飲既時候有口感，不要blend太耐，或者可以加入芒果粒粒

蝦醬豆卜蒸豬腩肉

媽媽餸必備菜式之一，好味又易整，好下飯喔

材料：

豆卜      ＄5

豬腩肉   ＄25

做法：

1. 豬腩肉、豆卜洗淨，豬腩肉切薄片，豆卜切半

2. 豬腩肉用蝦醬，酒，糖，粟粉拌勻，醃30分鐘

3. 豆卜舖底，放上豬腩肉片，隔水蒸15分鐘加葱花，完成

三杯雞

三杯雞名字的由來，即係用3種醬汁煮成的，分別為米酒，麻油，醬油用1比1的比例，再加入九層塔及辣椒仔將味道提升

材料：

泰安雞     半隻

九層塔     2-3棵

薑           5片

蒜片

紅蔥頭片

紅辣椒仔  1條切粒

醬汁：

米酒    30ml

麻油    30ml

生抽    30ml

冰糖    1細粒

做法：

1. 洗淨雞件

2. 落麻油至油熱，爆香薑片，紅蔥頭，蒜片

3. 放入雞件，雞皮向下，煎至金黃色

4. 倒入米酒、生抽、冰糖、辣椒粒，滾起後轉最細火，蓋上蓋煮至雞熟

5. 熄火，卒下九層塔，令到九層塔出味兜均，完成

檸蜜脆雞扒

天氣開始熱，食啲酸咪咪既餸就最開胃，用檸檬汁加蜂蜜整左個檸蜜汁，酸甜度自己調較，簡單又好味

材料：

雞扒    2塊

蛋白    1隻

粟粉    適量

醃料：

胡椒粉    少許

鹽            少許

生抽        少許

紹酒        半湯匙

汁料：

檸檬     1個

蜂蜜     適量

粟粉     適量

水         適量

做法：

1. 雞扒解凍後剪去肥膏，洗淨印乾水份，用醃料醃3小時

2. 雞扒沾上蛋白，再撲上薄薄一層粟粉，先將雞皮一面煎至金黃，再反轉另一面煎熟，拎起將雞扒放在廚紙上印走多餘油份

3. 洗淨檸檬，將檸檬磨皮只要黃色部分，再榨汁備用

4. 將檸檬汁及蜂蜜倒入煲仔中，用細火邊煮邊調較至合適既味道，最後加入適量粟粉水煮至杰身即可

5. 雞扒切件，灑上檸檬皮茸，再淋上檸蜜汁，完成

泰式豬頸肉

每次出街食泰國菜都必點既豬頸肉，要整得好食，個醬汁真係好緊要，呢個萬用醬汁除左用係豬頸肉，亦可以用係其他冷盤菜式度

  

材料：

豬頸肉 1塊

麥芽糖 1.5湯匙 + 小小水(座暖) 

醃料：

老抽  1/4杯

魚露  2湯匙

米酒  小小

砂糖  1-2 湯匙

醬汁：

青檸汁     1個

魚露         2湯匙

乾蔥碎     1.5湯匙

蒜蓉         1.5湯匙

檸檬葉     小小

白醋         1湯匙

指天椒     1隻

芫茜         小小

做法：

1. 豬頸肉洗淨抹乾，將醃料拌勻放入豬頸肉最少醃3小時

2. 醃好豬頸肉放入預熱180度焗爐，每邊焗15分鐘

3. 再塗上麥芽糖每邊焗多10分鐘，逆紋切件上碟，完成